महाआरोग्य शिबिरात उमरगा येथे आयुष्मान कार्ड नोंदणीला उत्स्फूर्त प्रतिसाद
उमरगा, धाराशिव – उमरगा येथे आयोजित महाआरोग्य शिबिरात नागरिकांनी मोठ्या संख्येने सहभाग घेतला. या शिबिरात विशेषतः ‘आयुष्मान भारत प्रधानमंत्री जन आरोग्य योजना’ अंतर्गत लाभार्थ्यांची नोंदणी आणि आयुष्मान कार्ड वाटप करण्यात आले.
शिबिरात उमरगा आणि परिसरातील हजारो नागरिकांनी हजेरी लावली. शासनाच्या या महत्त्वाकांक्षी योजनेअंतर्गत लाभार्थ्यांना वर्षाकाठी ५ लाख रुपयांपर्यंत मोफत आरोग्य सेवा मिळणार आहे.
शिबिरात आरोग्य विभाग, जिल्हा प्रशासन आणि स्थानिक वैद्यकीय अधिकारी यांचा सक्रिय सहभाग होता. नागरिकांना कार्डसाठी आवश्यक असलेली कागदपत्रे – आधार कार्ड, रेशन कार्ड आणि ओळखपत्र तपासल्यानंतर त्यांचे आयुष्मान कार्ड त्वरित दिले गेले.
यावेळी स्थानिक लोकप्रतिनिधी आणि आरोग्य अधिकारी उपस्थित होते. त्यांनी या उपक्रमाचे स्वागत करतानाच अधिकाधिक नागरिकांनी या योजनेचा लाभ घ्यावा, असे आवाहन केले.
महाआरोग्य शिबिरात सर्वसामान्य नागरिक, गरीब कुटुंबे तसेच जेष्ठ नागरिकांनी मोठ्या संख्येने सहभाग घेतला. या योजनेत नव्याने ७० वर्षांवरील सर्व ज्येष्ठ नागरिकांना उत्पन्नाच्या अटीशिवाय समाविष्ट करण्यात आल्यामुळे अनेक वृद्ध लाभार्थ्यांनी आनंद व्यक्त केला.