पुणे: जिल्हा रुग्णालय, पुणे येथे पहिल्यांदाच आणि शासकीय रुग्णालयांच्या इतिहासात दुर्मिळ अशा प्रकारे, रोबोटिक्स-असिस्टेड टोटल नी रिप्लेसमेंट (टीकेआर) शस्त्रक्रिया यशस्वीरीत्या पार पडली आहे. ही शस्त्रक्रिया इंटिग्रेटेड आयुष्मान भारत प्रधान मंत्री जन आरोग्य योजना (PM-JAY) आणि महात्मा ज्योतिराव फुले जन आरोग्य योजना (MJPJAY) अंतर्गत पूर्णपणे मोफत करण्यात आली असून लाभार्थ्याला एकही रुपया मोजावा लागला नाही.
शस्त्रक्रियेची ठळक वैशिष्ट्ये
– रुग्णाचे नाव: तुलशिराम कोंडे, वय ६७ वर्षे, पुरुष – यांच्यावर रोबोटिक्स-असिस्टेड टोटल नी रिप्लेसमेंट (TKR) शस्त्रक्रिया करण्यात आली.
– या अत्याधुनिक तंत्रज्ञानामुळे गुडघ्याच्या सांध्यातील विकृती अत्यंत नेमकेपणाने दुरुस्त होऊन कृत्रिम सांधा बसवता येतो, ज्यामुळे वेदना कमी होणे, चालण्यात सुधारणा आणि पुनर्वसनाचा कालावधी कमी होण्यास मदत होते.
– रोबोटिक शस्त्रक्रियेच्या मदतीने हाडांचे कट्स अधिक अचूक होतात, मृदू ऊतींचे नुकसान कमी होते आणि शस्त्रक्रियेनंतर रक्तस्राव व गुंतागुंत होण्याचा धोका कमी राहतो.
सार्वजनिक आरोग्य व्यवस्थेसाठी टप्पा
जिल्हा रुग्णालय स्तरावर रोबोटिक्स-असिस्टेड टीकेआरची सुरुवात होणे हे सार्वजनिक आरोग्य व्यवस्थेसाठी एक क्रांतिकारी पाऊल मानले जात असून, अत्याधुनिक ऑर्थोपेडिक सेवा सर्वसामान्य नागरिकांपर्यंत योजनांद्वारे पोहोचवण्याच्या दिशेने हा महत्त्वाचा मैलाचा दगड ठरला आहे. आयुष्मान भारत PM-JAY आणि महात्मा ज्योतिराव फुले जन आरोग्य योजना या दोन्ही योजनांमुळे आर्थिकदृष्ट्या दुर्बल घटकांनाही उच्च दर्जाच्या शस्त्रक्रिया विनामूल्य मिळू शकतात, ही या कामगिरीची सर्वात मोठी जमेची बाजू आहे.
तज्ज्ञ पथकाचे कौतुक
जिल्हा रुग्णालय, पुणे येथील संपूर्ण अस्थिरोग विभाग, रोबोटिक शस्त्रक्रिया तज्ज्ञ, भूलतज्ज्ञ, नर्सिंग स्टाफ तसेच आयुष्मान भारत PM-JAY आणि महात्मा ज्योतिराव फुले जन आरोग्य योजनेच्या टीमचे विशेष अभिनंदन करण्यात येत आहे. त्यांच्या समन्वय, तांत्रिक कौशल्य आणि सेवाभावी दृष्टिकोनामुळे ही ऐतिहासिक कामगिरी शक्य झाली असून, पुढील काळात अशा शस्त्रक्रिया अधिक रुग्णांसाठी लाभदायी ठरतील, अशी अपेक्षा व्यक्त केली जात आहे.
